احنا الفاسدين

قولوا عليا اني محرض واني مدمر واني مخرب
وانا مش هنكر ابدا ولا هتهرب
ايوه محرض.. جيت حرضت الشعب لجل يثور
قولتله مره ينسي الضلمه ويعرف مره شكل النور
والعصفور في قفص متأيد يبقي ازاي بصحيح عصفور
وانا مش حر طول ماحاكمني شوية عسكر
يعني الشعب لسه ذليل وضعيف واهبل وبيتمسخر
وانا مش هرجع.. هفضل اناضل واتعب واسهر
واقتل كل الخوف وانهيه واعلي واكبر
اه بعترف.. اني محرض مين كان انكر
اما التانيه باني مدمر ايوه مدمر
عشان دمرت جدار الخوف وهدمت الظلم
عشان بحلم بوطن بصحيح.. ..اه كان حلم
عشان انا كنت الكومبارس وهو مبارك يبقي النجم
يبقي مدمر واقوي مدمر واعظم شهم
اما التالته باني مخرب.. ..فانا قررت اني مخرب
واوعي يا صاحبي تلوم علي صاحبك او تستغرب
انا خربت عقول الناس.. ..جيت قولتلهم
ان العسكر لو حكموكوا .. يبقي يا ويلكم قبل يا ويلهم
خوفي عليكم لو حكموكم يرجع تاني حكم القوه
الالاضيش والمهابيش ومعاهم برده اغبي فتوه
يبقي الله يرحمني ساعتها.. وبرده الله يرحمها الثوره
فانا قريت اني محرض واني مدمر واني مخرب
مش راح انكر ولا هستغرب ولا هتهرب
حسام عبد اللطيف